Kuch waqt tanha...(a Hindi poem)

Kuch waqt tanha, kuch hum berukhe,
Kuch bheega sawan, aur hum jode umeedein,
Kuch hum yahan, kuch tum wahan,
Kuch lamha mayus, kuch hum muskarane chale.

Kuch khoye aashiyanon mein khoye se sapne,

Kuch bikhre se rishton mein dhoonde apne,
Kuch mann ke sukhe panno ki adhuri khwaishein,

Kuch aalam bebasi ka, kuch palchinn suhaane.

Kuch ankahi baaton mein khilkhilati zindagi,
Kuch bhoole bisre kahaaniyon ki meethi si dhwani,
Kuch kam, kuch zyada, woh kaanch sa waada,
Kuch humne tode niyam, kuch dagmagata iraada.

Leelao ki vibhinnata se pare hain aaj hum,
Chintan ki peeda se katraye, gum sum,
Mitti ki chuppi khalti hain, jalti hain angaaron si,
Kuch jwala ki aas mein khade, kuch bujhhe aangare hain hum.